Caritas në mbështetje të komunës së Vitisë

Caritas dhe komuna e Vitisë kanë nënshkruar marrëveshje bashkëpunimi, e cila parasheh realizimin e një projekti për edukimin parashkollor për këtë komunë

Përfaqësuesit e organizatës Caritas nga Zvicra dhe autoritetet e Komunës së Vitisë kanë nënshkruar të enjten një marrëveshje bashkëpunimi, e cila parasheh realizimin e një projekti për edukimin parashkollor për këtë komunë. Marrëveshja është firmosur nga kryetari i Vitisë, Sokol Haliti dhe përfaqësuesi i Caritas-it, Albert Bakalli.

Kryetari Haliti tha se marrëveshjet e tilla janë në interesin e përgjithshëm në Komunën e Vitisë, duke potencuar se me këtë projekt do të ndihmohet arsimi në Viti, konkretisht edukimi parashkollor që sipas tij, është i një rëndësie të veçantë për brezat e ardhshëm.

Ndërkaq, Kreshnik Basha, shef i Zyrës së Caritasit të Zvicrës, tha se deri te kjo marrëveshje ka ardhur pas inicimit që ka bërë kryetari i komunës së Vitisë, ku ka kërkuar mbështetje në programin parashkollor.

“Ky projekt parasheh zhvillimin e kapaciteteve të edukimit parashkollor të Komunës së Vitisë dhe me këtë marrëveshje kjo komunë do të pajisët me tre klasa parashkollore në vitin 2014 dhe hapë rrugën për mbështetje në vitin në vijim” u shpreh Basha, citon RP.

Ai tha se më këtë marrëveshje parashihen pajisjet metodike të punës, rregullimi i klasës, trajnimi akademik etj.