Calmy Rey përkohësisht shtyn pranimin e çmimit “Diaspora”

Ministria e Jashtme e Zvicrës: "në rrethanat e publikimit të raportit të Marty-t, nuk është koha e përshtatshme për solemnitetin e çmimit"

Presidentja e Zvicrës njëherësh ministre e jashtme, Micheline Calmy Rey heq dorë përkohësisht nga pranimi i çmimit „Diaspora”, i cili do t`i jepej asaj në një solemnitet më 21 dhjetor në Bernë. Departamenti i jashtëm e ka prezantuar këtë vendim si shtyrje në kohë, shkruan botimi online i gazetës NZZ.　 

Pretekst për shtyrjen, thuhet të ketë qenë raporti i Dick Marty-t mbi „tregtinë e organeve” në Kosovë.

Çmimi „Diaspora” do t`i dorëzohej ministres së jashtme zvicerane të martën që vjen nga ambasadori i Kosovës në Zvicër, në shenjë mirënjohjeje për gjithë atë që ajo ka bërë për Kosovën.

„Në rrethanat e publikimit të raportit të Marty-t, tash për tash nuk është koha e përshtatshme për dorëzimin solemn të këtij çmimi”, ka njoftuar Departamenti i Punëve të Jashtme i Zvicrës.