Calmy-Rey e brengosur me dhunën në Libi

"E gjykoj çdo përdorim dhune dhe u bëj thirrje autoriteteve për vetëpërmbajtje maksimale", është shprehur ministrja Calmy-Rey

Në kohën kur raportet nga Libia flasin për qindra të vdekur, Ministria e Punëve të Jashtme e Zvicrës ka shprehur brengosjen e saj të thellë lidhur me përshkallëzimin e situatës atje. “E gjykoj çdo përdorim dhune dhe u bëj thirrje autoriteteve për vetëpërmbajtje maksimale”, është shprehur ministrja e jashtme e Zvicrës Micehline Calmy-Rey përmes një komunikate për mediet zvicerane. Ajo bën thirrje po ashtu që të mbrohet e drejta e shprehjes së lirë të mendimit dhe e drejta e tubimit.

Sipas komunikatës, Berna zyrtare është në kontakt të vazhdueshëm me Ambasadën Zvicerane në Tripolis. Ndërkaq Ministria nuk ka të dhëna lidhur me zviceranët që aktualisht mund të ndodhen në Libi. Në ambasadë janë paraqitur 46 qytetarë zviceranë, shumica e tyre me dyshtetësi.

Ministria e jashtme e Zvicrës porosit shtetasit e saj që ndodhen në Libi që tu shmangen grumbullimeve të masave dhe të braktisin sidomos qytetet në lindje të vendit.