Bursa për 732 studentët më të mirë të Kosovës

Ministra kosovare e Arsimit për herë të parë ndau bursa për 732 studentë të universiteteve publike të Kosovës

Për herë të parë që nga përfundimi i luftës, Ministria e Arsimit, Shkencës dhe Teknologjisë (MASHT) ndau 732 bursa shtetërore për studentët më të dalluar të universiteteve publike të Kosovës. Këta bursistë, nga ministri Arsim Bajrami, u cilësuan si gjenerata kosovare e të ardhmes.

“Ndihem krenar dhe me fat që në cilësinë e ministrit të Arsimit, të takoj studentët më të mirë të universiteteve publike të Kosovës dhe në emër të Qeverisë së Kosovës të ndaj bursat shtetërore, si një mirënjohje për gjeneratën e re, gjeneratë e cila nesër do ta zhvillojnë shtetin tonë, ekonominë tonë, për ta bërë Kosovën krenare dhe pjesë të barabartë të Bashkimit Evropian”, theksoi ministri Bajrami.

Ai tha se fondi për ndarjen e bursave shtetërore është krijuar nga kursimet e buxhetit të Ministrisë, në funksion të zhvillimit të kuadrove të reja, ndërkaq ritheksoi se reforma në arsimin e lartë krijon gjenerata të përgatitura, të cilat sigurojnë familje të forta dhe mirëqenie shoqërore.

“Kosovës, ndër të tjera, i duhet edhe një tranzicion i gjeneratave. I duhen gjenerata që mendojnë për teknologjitë e shekullit 21, për të arriturat e internetit dhe përfshirjen e gjerë në tregun e punës. Për të ngritur këtë kauzë nuk ka gjë më të mirë se sa të sigurosh fonde shtetërore për të investuar në bursat e studentëve”, tha ministri Bajrami.

Nga janari i vitit 2016, sipas ministrit Bajrami, do të demonstrohet cilësi dhe do të prezantohen produktet e para të punës njëvjeçare të Ministrisë.

Në fund, ministri Bajrami ka thënë se, vetëm gjatë këtij viti akademik janë dërguar për studime më shumë se 200 studentë në Shtetet e Bashkuara të Amerikës, Britani të Madhe dhe shtete të tjera, me financim të plotë të Qeverisë së Kosovës dhe qeverisë amerikane përmes USAID-it.