Burrështetasit evropianë: “Tuneli Gotthard një vepër me rëndësi epokale për Evropën”

Kancelarja gjermane Angela Merkel me këtë rast ka lavdëruar largpamësinë dhe guximin e Zvicrës për të realizuar një vepër të tillë. “Është shumë më tepër se sa një tunel”

Keystone

Mysafirët e lartë nga jashtë  që morën pjesë në përurimin e tunelit bazik të Gotthard-it në Zvicër kanë dhënë vlerësime shumë të larta për këtë vepër të madhe ndërtimore. Ata e kanë theksuar disa herë se ky tunel është simbol i lidhjes në mes të popujve, nisur nga fakti se shkurton rrugën në mes të veriut dhe jugut, si nyja më e përshtatshme dhe e shfrytëzuar më së shumti për këtë lidhje.

Kështu, kancelarja gjermane Angela Merkel me këtë rast ka lavdëruar largpamësinë dhe guximin e Zvicrës për të realizuar një vepër të tillë. “Është shumë më tepër se sa një tunel”, ka thënë ajo, duke vënë në pah se ndërtimi i tij i kontribuon lidhshmërisë dhe larushisë së Evropës, duke u bërë edhe simbol për to.

Edhe më i drejtpërdrejtë në komplimentet drejtuar Zvicrës ka qenë presidenti francez François Hollande, duke thënë se Franca përkulet para Zvicrës. “Sot në Zvicër, një ëndërr evropiane është bërë realitet”, ka thënë ai veç tjerash.

Ndërsa kryeministri italian Matteo Renzi ka konstatuar se me këtë “vepër ndërtimi shekullore”, rritet presioni ndaj Italisë për zgjerimin e lidhjeve hekurudhore italiane me Zvicrën.