Burkhalter: Zvicra mbështet vizionin e Kosovës

Presidenti i Zvicrës, Burkhalter tha se bizneset zvicerane duan të bëjnë investime afatgjata në rajon, por forcimin e rendit dhe ligjit e konsiderojnë si parakusht për këtë

Presidenti i Konfederatës së Zvicrës, Didier Burkhalter, i cili është njëherit shef i Departamentit federal për Punë të Jashtme dhe kryesues i radhës së OSBE-së, tha se Kosova ka arritur progres të konsiderueshëm dhe Zvicra mbështet vizionin e Kosovës për të ardhmen.

 

Këto komente presidenti Didier Burkhalter i bërë gjatë një takimi që zhvilloi në Prishtinë me presidenten e Republikës së Kosovës, Atifete Jahjaga. Kjo e fundit dhe presidenti helvetik biseduan për konsolidimin e shtetësisë së Kosovës, zhvillimin ekonomik dhe procesin e integrimit evropian të vendit.

 

Presidenti Burkhalter tha se bizneset zvicerane duan të bëjnë investime afatgjata në rajon dhe e konsiderojnë forcimin e rendit dhe ligjit si parakusht për një hap të tillë.

 

Në kuadër të kryesimit të radhës të OSBE-së, presidenti Burkhalter theksoi se Zvicra do të bëjë përpjekje për të integruar Kosovën në iniciativat rajonale. Ai po ashtu shprehu gatishmërinë e OSBE-së që të lehtësojë procesin e zgjedhjeve të ardhshme në Republikën e Kosovës.

 

Ndërkaq, presidentja Jahjaga shprehu mirënjohjen e popullit të Kosovës për kontributin e Zvicrës në strehimin e shumë qytetarëve të Kosovës në këtë vend gjatë viteve të 90-ta, vendosjen e paqes dhe stabilitetit përmes kontingjentit zviceran në forcën paqeruajtëse të KFOR-it, si dhe njohjen e pavarësisë së Kosovës.

 

Ajo tha se ky është një vit i rëndësishëm zgjedhor në Kosovë, dhe se spektri politik i Kosovës dhe institucionet e vendit janë të përkushtuar, ashtu si në zgjedhjet e fundit lokale, që të sigurojnë një proces të lirë dhe të ndershëm zgjedhor, që do të jetë gjithashtu një test i pjekurisë tonë demokratike dhe sundimit të ligjit në Kosovë.

 

Presidentja Jahjaga theksoi se Kosova ka nevojë urgjente të adresojë zhvillimin ekonomik dhe të tërheqë investimet e huaja, të cilat do të ndihmonin në rivitalizimin ekonomik të vendit.

 

“Duke pasur parasysh afërsinë e bizneseve zvicerane me tregun tonë, por edhe diasporën tonë që jeton në Zvicër, kërkojmë identifikimin e fushave të interesit të përbashkët për të dinamizuar këto lidhje dhe për të krijuar mundësi të mira për investime”, deklaroi Jahjaga.

 

Presidentja kosovare po ashtu, theksoi se rajoni i Ballkanit Perëndimor është në një moment vendimtar, veçanërisht me hapjen e kapitullit të ri për paqe dhe pajtim që u hap me dialogun Kosovë-Serbi, që do t’i kontribuojë normalizimit të marrëdhënieve ndërshtetërore, si kusht kryesor për anëtarësimin e rajonit në Bashkimin Evropian.

 

Ajo kërkoi që marrëveshjet e arritura në Bruksel të zbatohen në plotëni.

 

Ndryshe, presidenti i Zvicrës dhe kryesuesi i radhës i OSBE-së, Didier Burkhalter është në një vizitë në shtetet e Ballkanit. Ajo dje vizitoi Beogradin dhe  Tiranën ndërsa sot po qëndron në Prishtinë.

 

“Pajtimi dhe bashkëpunimi në Ballkanin Perëndimor janë ndër prioritetet e kryesimit të OSBE-së nga Zvicra, që mbështetet në angazhimin e kamotshëm të këtij vendi në nxitjen e paqes në këtë pjesë të botës”, deklaroi Burkhalter në prag të vizitës raporton Zyra e OSBE-së në Prishtinë.

 

Me gjashtë misione në terren anembanë rajonit, Ballkani Perëndimor, sipas tij, është një fushë e rëndësishme për operacionet e OSBE-së.

 

Vizita e kryesuesit të radhës, sipas OSBE-së, ka për qëllim mbështetjen e tri proceseve të vazhdueshme që Zvicra i ka identifikuar si të rëndësishme për stabilitet në Ballkanin Perëndimor.

 

“Këto janë normalizimi i marrëdhënieve, në përputhje me marrëveshjen e arritur në mes të Beogradit dhe Prishtinës vitin e kaluar, forcimi i përpjekjeve të bashkëpunimit rajonal, dhe inkurajimi i pajtimit rajonal në veçanti kur është fjala për zgjidhjen e çështjes së personave të zhdukur”, është thënë në prag të vizitës.

---