Burkhalter, mesazh në ditën e kujtimit të viktimave të Holokaustit

Të martën, presidenti Burkhalter do të qëndrojë në qytetin polak Krakau (Krakow) për të vizituar ish kampin për shfarosje Auschwitz-Birkenau

Në Ditën e përkujtimit te viktimave të holokaustit, presidenti federal i Zvicrës, Didier Burkhalter i është drejtuar kombit me një mesazh ku është shprehur kundër të gjitha formave të urrejtjes ndaj të huajve dhe racizmit.

“Përmasat si dhe vetë ekzistenca e Holokaustit, vrasja e miliona hebrenjve edhe sot vazhdojnë të mohohen, ashtu si dhe rastet tjera të gjenocidit. Një qëndrim të tillë mohimi do të duhej ta refuzojnë që të gjithë dhe të dalin në mënyrë të vendosur kundër mohimit të fakteve historike”, ka theksuar Burkhaklter në mesazhin e bërë të hënën. Për më tepër, ka shtuar ai, një qëndrim i tillë refuzues është i nevojshëm për çdo ditë dhe jo vetëm në ditën e caktuar si Ditë e Përkujtimit të Viktimave të Holokaustit.

Në mesazhin e tij, i pari i vendit më tutje u është drejtuar në mënyrë të veçantë të rinjve. Brezat që po vijnë qëndrojnë në mes të një procesi të mësimit dhe njohjes, zbulimit të botës. Në këto ditë, një numër i madh mësimdhënësish po angazhohen që t`ua bëjnë të ditur të rinjve se sa të rrezikshme janë ksenofobia dhe racizmi dhe se sa e rëndësishme është mbrojtja e të drejtave të njeriut .

Nesër, ditë e martë, Burkhalter do të qëndrojë në qytetin polak Krakau (Krakow) për të vizituar ish kampin për shfarosje Auschwitz-Birkenau, shkruan srf.ch.

Me këtë veprim ai dëshiron të japë një sinjal të qartë se për ne është e rëndësishme që kurrë më të mos ndodhë diçka e tillë”.

Në vizitën e tij në Poloni, presidentin e shoqëron edhe një shkrimtare e re zvicerane. Gjyshi i saj i internuar në Auschwitz kishte mbijetuar.

Vizita e Burkhalterit në Auschwitz behet një ditë pas Ditës Përkujtimore për Viktimat e Holokaustit, që është sot, më 27 janar. Kjo ditë përkujton ditën kur ushtarët sovjetikë liruan kampin në fjalë, me ç`rast gjetën rreth 7000 të mbijetuar.