Bruksel, arrihet marrëveshja për ndërtesat e IBM-së

Delegacioni i Kosovës dhe ai i Serbisë arritën një marrëveshje për ndërtimin e 6 objekteve të përhershme kufitare. Këto pika do të financohen nga BE me 21 milionë €

Përfaqësuesit e Qeverisë së Kosovës dhe ata të Serbisë, me ndërmjetësimin e Bashkimit Evropian, kanë nënshkruar sot në Bruksel, marrëveshjen për ndërtimin e gjashtë ndërtesave të përhershme në kufi, të njohura si IBM. Ndërtimi i këtyre objekteve do të financohet nga BE.  

 

Zëvendëskryeministrja Edita Tahiri, e cila ka kryesuar ekipin negociator të Prishtinës, marrëveshjen e ka konsideruar shumë e rëndësishme, me të cilën, siç ka thënë ajo,  rrumbullakohet zbatimi i plotë i Marrëveshjes së IBM-it (Menaxhimit të Integruar të Kufirit) dhe të Protokollit Teknik.

 

“Dhe praktikisht të dyja shtetet do të bashkëpunojnë në fushën e Menaxhimit të Integruar të Kufirit sipas standardëve më të larta të BE-së”, deklaroi Tahiri.

 

Sipas një deklarate lëshuar nga Qeveria në detyrë, kjo marrëveshje në është negociuar tash një vit dhe arritja e saj, “shënon edhe një kontribut të të gjitha palëve për lehtësimin e lëvizjes së lirë të njerëzve dhe mallrave, rritjen e kualitetit dhe sigurisë së kontrollit kufitarë, dhe është në funksion të përmbushjes së kritereve për liberalizimin e vizave për Kosovën”.

 

Marrëveshja, siç thuhet më tej, rikonfirmon se Qeveria e Kosovës mbetet e përkushtuar në zbatimin e marrëveshjeve të Brukselit dhe procesin e normalizimit të marrëdhënieve ndërshtetërore me shtetin fqinj, Serbinë, dhe për avancimin e politikave të fqinjësisë së mirë në rrugëtimin e saj për integrimet Evropiane.

 

“Me këtë marrëveshje parashihet ndërtimi i gjashtë pikave kufitare sipas konceptit të IBM-it me të gjithë infrastrukturën e nevojshme përcjellëse sipas standardeve më të larta të Bashkimit Evropian”, thuhet në deklaratë.

 

Këto pika të përhershme kufitare do të ndërtohen me financimin e Komisionit Evropian përmes fondeve të Instrumentit të Para Aderimit (IPA) me një shumë prej mbi 21 milionë Euro.

 

“Komisioni Evropian në bazë të procedurave të brendshme parasheh që ndërtimi i këtyre pikave kufitare të IBM-it të filloj në fillim të vitit të ardhshëm”, konsideron qeveria.

 

Delegacioni i Kosovës vlerëson lartë angazhimin dhe kontributin e BE-së për arritjen dhe nënshkrimin e kësaj marrëveshjeje, si dhe zotimin e BE-së për të marrë përsipër financimin dhe ndërtimin e plotë të pikave kufitare të IBM-it në mes të Kosovës dhe Serbisë.

 

Ndryshe, Prishtina dhe Beogradi, dy vjet më parë kanë nënshkruar marrëveshjen për Menaxhimin e Integruar të Kufirit, ndërsa si rezultat kanë improvizuar disa objekte të përkohshme kufitare. Me marrëveshjen që u realizua sot, objektet do të jenë të përbashkëta dhe të përhershme.

---