Bosnjë e Hercegovinë: Gjykata urdhëron paraburgim për liderët e Republika Srpska

Keystone EPA/NIDAL SALJIC

Gjykata e Bosnjës dhe Hercegovinës ka urdhëruar paraburgimin 30-ditor të liderëve të entitetit serb Republika Srpska, përfshirë presidentin Millorad Dodik, kryeministrin Radovan Višković dhe kryetarin e Asamblesë Kombëtare, Nenad Stevandić. Ata janë nën hetim për cenim të rendit kushtetues, një vepër penale që mund të dënohet me burg deri në pesë vjet.

Të tre liderët kishin refuzuar të paraqiteshin për intervistim në Prokurorinë e Bosnjës, gjë që çoi në lëshimin e një urdhri për ndalimin e tyre. Hetimet për këtë rast kishin nisur në dhjetor 2024 dhe autoritetet boshnjake kanë kërkuar ndihmën e Agjencisë Shtetërore të Hetimit dhe Mbrojtjes (SIPA) për zbatimin e urdhrit. Nëse ndalimi nuk realizohet, mund të lëshohet edhe një fletarrestim kombëtar, përcjell albinfo.