Bletarët e Kosovës, pjesë e Organizatës Botërore të Bletarisë

Sipas të dhënave nga Ministra e Bujqësisë, në Kosovë aktualisht veprojnë rreth 6500 bletarë me rreth 70500 koshere bletësh

Lidhja e Bletarëve të Kosovës shumë shpejt do të jetë pjesë e Organizatës Botërore të Bletarisë “Apimondia”, e cila ka konfirmuar se e ka njohur të drejtën e anëtarësimit të bletarëve kosovarë në këtë organizatë. Kjo është bërë e ditur gjatë një takimi që zëvendësministri i Bujqësisë, Pylltarisë dhe Zhvillimit Rural, Vezir Januzi pati me përfaqësuesit e Lidhjes së Bletarëve.

Në këtë takim, siç thuhet në një komunikatë për media, është bisedua për hapat e mëtejmë të bashkëpunimit mes Ministrisë së Bujqësisë dhe Lidhjes së Bletarëve.

Zëvendësministrit Januzi, tha se anëtarësimi në këtë organizatë, ka një rëndësi të madhe për zhvillimin e mëtejmë të bletarëve në vend dhe sipas tij, kjo arritje është bërë falë bashkëpunimit të Lidhjes së Bletarëve me Ministrisë së Bujqësisë, Pylltarisë dhe Zhvillimit Rural.

Ndryshe, sipas të dhënave të kësaj ministre, në sektorin e prodhimit të mjaltit në Kosovë, aktualisht veprojnë rreth 6500 bletarë me rreth 70500 koshere bletësh. Kosova, ndërkaq  ka kushte mjaftë të përshtatshme për t`u marrë me bletari, sidomos Rrafshi i Dukagjinit, ku sipas ekspertëve, ekzistojnë 127 lloje të bimëve mjaltëdhënëse me vegjetacion nga pranvera e hershme deri në vjeshtën e vonshme.