“Blej Shqip” në qendër të Prishtinës

Ky panair edhe këtë vit organizohet nga komuna e kryeqytetit për nder të festën e flamurit dhe ditës së Pavarësisë së Shqipërisë

Kompanitë shqiptare nga trevat e Ballkanit do të kenë mundësi që t’i prezantojnë produktet e tyre në panairin tashmë tradicional “Bej Shqip” që do të mbahet për tri ditë rresht në qendër të Prishtinës. Ky panair edhe këtë vit organizohet nga komuna e kryeqytetit për nder të festën e flamurit dhe ditës së Pavarësisë së Shqipërisë.

Drejtoresha për Kulturë në Komunën e Prishtinës, Saranda Bogujevci, tha për KPress se gjatë gjithë ditëve festive panairi “Blej Shqip”, do të pres e përcjell vizitorë të ndryshëm, të cilët kanë mundësinë e blerjes së shumë produkteve ushqimore, rrobave me motive kombëtare, etj.

Panairi “Blej Shqip është realizuar në bashkëpunim me Ministrinë e Tregtisë, Zhvillimit Ekonomik, Turizmit dhe Sipërmarrjes, të Qeverisë së Republikës së Shqipërisë. Ky panair nis me 27 nëntor dhe do të zgjas deri më 29 nëntor. Panairi do të promovohet në sheshin “Skënderbeu” tek bulevardi “Nëna Terezë”.

Vitin e kaluar më shumë se 100 kompani shqiptare kanë marrë pjesë në këtë panair, ndërsa tendat ku ishin ekspozuar produktet shqiptare, janë vizituar nga shumë qytetarë, përfshirë edhe liderë politikë e përfaqësues institucionesh.

Ndryshe, iniciativa “Blej Shqip” u konkretizua në pranverën e vitit 2010. E iniciuar nga Rrjeti i organizatave shqiptare (RrOSH) projekti ‘Blej Shqip’ synonte të nxiste konsumatorët shqiptarë të blejnë produkte dhe shërbime shqiptare. Për herë të parë pas 4 viteve, kjo iniciativë u bë pjesë e kalendarit institucional në Prishtinë e Tiranë, e iniciativën e kryetarit të Prishtinë, Shpend Ahmeti.