Bernë: Köniz ndalon telefonat celularë në shkolla

Foto ilustrim: Kelly Sikkema

Që nga fillimi i shkurtit, telefonat celularë janë të ndaluar në mënyrë të përgjithshme në të gjitha ambientet shkollore në komunën Köniz të Kantonit të Bernës. Vendimi, i cili ka për qëllim të përmirësojë përqendrimin e nxënësve dhe të zbusë ndikimet negative të hapësirës digjitale, po jep tashmë rezultatet e para pozitive.

Në mëngjes, para orës së gjimnastikës, Sacha (14) dhe shokët e tij të klasës vendosin telefonat në një “garazh telefoni” në klasë. Edhe pse ai ankohet për “udhëtimin shtesë” deri në klasë përpara sportit, ai, së bashku me Carla, Alishën, Emmën, Eleynën, Aschleyn dhe Yaran – të gjithë të moshës 13-15 vjeç – e mbështesin plotësisht ndalimin. Sipas tyre, pa telefonat, pushimet janë më të gjalla dhe orët më të përqendruara. Konfliktet sociale gjithashtu janë zbutur dukshëm.

“Kur isha gjashtë vjeç, luaja në rërë – tani fëmijët kanë telefona e përdorin fjalë që nuk duhet t’i dinë,” thotë Sacha, duke reflektuar një shqetësim që ndajë shumë mësues dhe prindër. Mësuesja e klasës Nadine Schindler (30) dhe bashkëdrejtori i shkollës, Niels Lang (51), konfirmojnë se reagimi nga prindërit ka qenë mjaft pozitiv. “Prindërit janë të lumtur që rregulli është në fuqi,” thotë Schindler, shkruan Blick, transmeton albinfo.ch.

Lang thekson se ndalimi nuk është zbatuar për të ushtruar kontroll, por për të nxitur dialog dhe të ndryshuar zakonet e fëmijëve. Ai pranon se ndalimi nuk është zgjidhje magjike: “Shkaktarët e problemeve vijnë nga koha e lirë, por ndikojnë në jetën shkollore”, transmeton albinfo.ch.

Ekspertët kanë kohë që paralajmërojnë për rreziqet që sjell përdorimi i hershëm i rrjeteve sociale – që nga varësia e deri te ngacmimi kibernetik e shpërndarja e përmbajtjes së papërshtatshme. Shtatë adoleshentët e intervistuar pohojnë se e kalojnë pjesën më të madhe të kohës së lirë në TikTok – dhe vetë e përshkruajnë atë si “varësi”. Carla (14) thotë: “Thjesht do të vazhdosh të shfletosh.”

Ndërkohë, në nivel kombëtar, po shtohen thirrjet për një rregullim më të rreptë të mediave sociale dhe prezantimin e verifikimit të moshës. Një propozim i deputetes Maya Graf (63, Partia e Gjelbër) është referuar tashmë nga Këshilli i Shteteve për shqyrtim nga qeveria federale. Një peticion i drejtuar Ministres së Shëndetësisë Elisabeth Baume-Schneider (61, SP) kërkon ndërhyrje konkrete për të mbrojtur të miturit në hapësirën digjitale.

Në një kohë kur Franca dhe Australia kanë vendosur ndalime të përgjithshme për telefonat në shkolla dhe kufizime për përdorimin e rrjeteve sociale, shembulli i Köniz mund të shërbejë si model për Zvicrën – edhe pse sfidat e edukimit digjital mbeten të mëdha, transmeton albinfo.ch.