Beogradi s’lejon përmendore për dëshmorët shqiptarë

Sipas burimeve nga Lugina e Preshevës, autoritetet serbe i kanë ndaluar shqiptarët që ta ndërtojnë përmendore për pjesëtarët e UÇPBM-së në Rahovicë.

Pas heqjes së lapidarit të dëshmorëve nga qendra e Preshevës, autoritetet serb nuk do ta lejojnë as ndërtimin e një kompleksi memorial për dëshmorët e ish-Ushtrisë Çlirimtare për Preshevë, Medvegjë dhe Bujanoc (UÇPMB) që po ndërtohet në fshatin Rahovicë të komunës së Preshevës.

Sipas burimeve nga Lugina e Preshevës, autoritetet serbe i kanë ndaluar shqiptarët që   ta ndërtojnë përmendore për pjesëtarët e UÇPBM-së në Rahovicë.

E përditshmja serbe ‘Danas’ raporton se zyrtarëve lokalë u është dërguar njoftimi për ndalimin e punëve të nisura për ndërtimin e kompleksit memorial në Rahovicë, pak kilometra larg Preshevës.

“Ne kishim planifikuar që në një sipërfaqe tremijë metrash katrorë të ndërtonim një kompleks memorial në kujtim të pjesëtarëve të rënë të UÇPBM-së gjatë luftës më 2001”, citon kjo gazetë burimet shqiptare të Luginës, raporton INA.

Gurthemelin për këtë përmendore e kishin vënë kryetari i Preshevës, Ragmi Mustafa, dhe ai i Kuvendit të Preshevës, Ramiz Latifi. Ndërprerjen e punimeve me urdhër të autoriteteve të Beogradit është konfirmuar edhe nga Fadil Azizi, kryetar i Bashkësisë Lokale të Rahovicës.

Ndryshe, disa muaj më parë, forcat e mëdha të xhandarmërisë serbe, kishin larguar dhunshëm nga qendra e Preshevës një lapidarë ku ishin gdhendur emrat e dëshmorëve të ish-UÇPMB-së që kishin rënë gjatë konfliktit të vitit 2001. Kjo ngjarje bëri jehonë në gjithë Ballkanin, ndërsa acaroi marrëdhëniet ndëretnike në “Serbinë jugore”

UÇPMB ka qenë një strukturë ushtarake guerile e përbërë nga vullnetarët shqiptarë që jetojnë në Preshevë, Medvegjë dhe Bujanoc, tri komuna me shqiptarë që administrohen nga Beogradi. UÇPMB ishte shpërbërë pas një marrëveshje paqësore, ndërsa guerilet e saj ishin amnistuar nga Kuvendi i Serbisë.