BE: Dialogu me Kosovën të vazhdojë edhe me Nikoliqin

Bashkimi Evropian e ka vlerësuar fitoren e kreut të Partisë Përparimtare Serbe, Tomisllav Nikoliq, në zgjedhjet për president të Serbisë

Në reagimin e BE-së thuhet se është fituar një mandat i fuqishëm për vazhdimin e politikave të integrimit evropian.

Maja Kocijanqiq, zëdhënëse e shefes së diplomacisë evropiane, Kethrin Eshton, ka theksuar në Bruksel se BE-ja inkurajon Nikoliqin dhe ekzekutivin e ardhshëm në Beograd të vazhdojnë punën në procesin integrues të vendit për në Bashkimin Evropian.

“Serbia ka hyrë në këto zgjedhje vetëm disa javë pasi mori statusin e vendit kandidat (për anëtarësim në BE). Presidenti i ri dhe qeveria që duhet të formohet kanë marrë një mandat të fuqishëm për të vazhduar zbatimin e politikave për integrim evropian dhe për të lëvizur shpejt në hapat e mëtejmë, veçanërisht, në drejtim të nisjes së negociatave për anëtarësim sapo të jenë plotësuar kushtet”, ka theksuar ajo.

Duke folur për dialogun ndërmjet Kosovës e Serbisë, që ishte lansuar në mars të vitit të kaluar me qëllim përmirësimin e raporteve ndërmjet të dyja vendeve drejt integrimit evropian, Kocijanqiq u shpreh se dialogu gëzon mbështetjen e plotë të bashkësisë ndërkombëtare. 

“Ka mbështetjen e plotë të Këshillit Evropian dhe është futur formalisht në procesin e integrimit evropian të Serbisë. Andaj, presim vazhdimin e dialogut”, ka theksuar ajo.