Avokati i Thaçit nga Haga: Kjo fazë e procesit do të zbardhë të vërtetën historike për Kosovën

Në prag të rinisjes së seancave gjyqësore ndaj ish-presidentit të Kosovës, Hashim Thaçi, në Dhomat e Specializuara në Hagë, avokati i tij Pierre-Richard Prosper ka deklaruar për mediat se ekipi i mbrojtjes është i përgatitur dhe optimist për këtë fazë të re të procesit, transmeton albinfo.ch

Sipas Prosper, gjykimi tani hyn në një pikë kthese ku do të paraqiten prova që, sipas mbrojtjes, do të vërtetojnë pafajësinë e Thaçit dhe do të ndriçojnë rrethanat e vitit 1999 në Kosovë.

“Ky është një moment i rëndësishëm për të parë realitetin dhe për të sjellë të vërtetën. Presim që dëshmitë dhe provat që do të paraqesim të tregojnë qartë se Presidenti nuk ka përgjegjësi për akuzat që i janë bërë”, theksoi ai.

Lidhur me dëshmitarët e mbrojtjes, Prosper u shpreh se nuk ka qenë e vështirë t’i bindin për të marrë pjesë në proces, pasi shumica duan të ndajnë publikisht të vërtetën. Ai shtoi se procedurat ligjore për autorizimet janë ndjekur me sukses dhe se dëshmitë e ardhshme do të kenë peshë të madhe në ecurinë e çështjes.

Procesi kundër Thaçit dhe bashkë të akuzuarve Kadri Veseli, Jakup Krasniqi dhe Rexhep Selimi po vazhdon prej muajsh, ndërsa faza e mbrojtjes shihet si vendimtare për rrjedhën e mëtejshme të gjykimit.