Austria e gatshme të ndihmoj në tejkalimin e krizës politike

Ministri i Jashtëm austriak, Sebastian Kurz tha se Austria mbështet fuqishëm perspektivën evropiane të Kosovës. Ai u deklarua kundër dhunës në Kuvend

Ministri për Evropë, Integrime dhe Punë të Jashtme i Republikës së Austrisë, Sebastian Kurz tha se Kosova po kalon në një moment të vështirë politik në planin e brendshëm dhe ftoi të gjithë spektrin politik për tejkalimin e situatës brenda institucioneve, përmes frymës demokratike dhe dialogut.

Shefi i diplomacisë austriake theksoi se Kosova ka nevojë për stabilitet të brendshëm dhe një perspektivë të qartë evropiane, gjersa Austria është e gatshme që të ndihmojë në këtë drejtim.

Këto deklarata Kurz i bëri gjatë një takimi që zhvilloi në Prishtinë me zëvendëskryeministrin, njëherësh ministër i Punëve të Jashtme të Republikës së Kosovës, Hashim Thaçi. Ai tha se Austria mbetet në mesin e investitorëve të rëndësishëm në Kosovë dhe njëkohësisht mbështet fuqishëm perspektivën evropiane të saj.

Ministri Kurz falënderoi Kosovën për bashkëpunimin dhe suksesin e arritur në tejkalimin e sfidës se fluksit te migrantëve nëpër shtetet e BE-së, ndërsa ritheksoi se nuk ka azil në Austri për kosovarët.

“Dua të them këtu shumë qartë  se nuk shansa për emigrim ilegal në Austri, dhe në vend të tjera të Evropës. Kush tenton nga Kosova  që në mënyrë ilegale të ik, duhet të llogarit që për një kohë të shkurtër do të kthehet përsëri”, ka potencuar Kurz.

Ai e përgëzoi qeverinë kosovare për progresin e shënuar në procesin e normalizimit të marrëdhënieve me Serbinë në kuadër të dialogut në Bruksel.

Ministri austriak Kurz i inkurajoi autoritetet kosovare që të thellojnë përpjekjet në luftën kundër korrupsionit dhe në forcimin e sundimit të së drejtës, gjë që, sipas tij, do t’i sjellë Kosovës edhe më shumë investime në të gjitha fushat.

Zëvendëskryeministri Thaçi, ndërkaq e falënderoi Austrinë për mbështetjen dhënë Kosovës në rrugëtimin e saj euroatlantik, për rolin e saj në kuadër të EULEX-it dhe KFOR-it, si dhe në tejkalimin e sfidës së përbashkët të valës së migrantëve.

“Është e mirëseardhur që ministri Kurz viziton rajonin, shpresoj në mënyrë tradicionale, në fillim të çdo viti, për të konfirmuar interesimin e Austrisë për Kosovën dhe rajonin”, është shprehur Thaçi gjatë takimit.

Thaçi tha se Austria është ndër investitorët kryesorë në Kosovë dhe ndër partnerët më të rëndësishëm në ekonomi e në arsim.

Ministri austriak u takua edhe me kryeministrin e Kosovës, Isa Mustafa. Gjatë takimit, u bisedua për fuqizimin e bashkëpunimit ndërmjet dy vendeve, sidomos në fushën e zhvillimit ekonomik dhe përkrahjen austriake në proceset integruese. Gjatë këtij takimi, ministri Kurz theksoi nevojën që opozita të distancohet nga dhuna dhe që zgjidhjet për të gjitha çështjet të bëhen me dialog.