Austri, shoqata e mësuesve “Naim Frashëri” vijon shpërndarjen e teksteve

Mësohet se 338 tekste “Të mësojmë gjuhën shqipe dhe kulturën shqiptare 1, 2, 3”, të paracaktuara për mësimdhënien në diasporë, janë dërguar falas nga Qendra e Botimeve për Diasporën, me mbështetjen e Ministrisë për Evropën dhe Punët e Jashtme, për të gjithë fëmijët shqiptarë që ndjekin kurset e mësimit të gjuhës shqipe në Austri, përcjell albinfo.ch.

Ambasada e Republikës së Shqipërisë në Vjenë ka pritur në mjediset e saj përfaqësues të Shoqatës së mësuesve shqiptarë në Austri “Naim Frashëri”, kryesuar nga kryetarja e shoqatës, znj. Miradije Berishaj.

Në këtë takim u shkëmbyen mendime rreth procesit të mësimdhënies së gjuhës shqipe në Austri dhe sfidave me të cilat përballet ky proces. Përfaqësuesit e shoqatës shprehën vlerësimin për mbështetjen nga shteti shqiptar dhe Ambasada e Republikës së Shqipërisë në Vjenë, për ndimën e ofruar në vazhdimësi dhe, posaçërisht në pajisjen me tekste shkollore për nxënësit, që po kontribuon dukshëm në ruajtjen e gjuhës shqipe.

Tekstet mësimore do të përdoren nga mësues e nxënës aty ku zhvillohet mësimi i gjuhës shqipe, përkatësisht në Vjenë, Austrinë e Poshtme, Vorarlberg, Steiermark, Kärnten.