Austri: Kufizime dhe ndryshime në shërbimin hekurudhor

Foto FB: Österreichische Bundesbahnen (ÖBB)

Nga 2 deri më 18 gusht, pasagjerët që udhëtojnë në zonën e Deutsches Eck do të përballen me ndryshime dhe kufizime në shërbimin hekurudhor për shkak të punimeve ndërtimore nga Deutsche Bahn. Këto ndërhyrje ndikojnë veçanërisht shërbimet e distancave të gjata midis Salzburgut, Innsbruck, Bregenz/Zyrih dhe Mynihut, shkruan ORF, transmeton albinfo.ch.

Sipas ÖBB, do të ketë devijime rrugësh dhe shërbime zëvendësimi hekurudhor për të lehtësuar lëvizjen e udhëtarëve. Trenat RJX po funksionojnë kryesisht sipas orarit në seksionet Vjenë-Salzburg dhe Wörgl-Bregenz, përfshirë kthimin.

Midis Stacionit Qendror të Salzburgut dhe stacioneve Kufstein, Wörgl dhe Innsbruck, do të ofrohet shërbim zëvendësues me autobusa me kode ngjyrash për të lehtësuar udhëtimin gjatë periudhës së punimeve.

Trenat midis Vjenës dhe Cyrihut do të devijohen nëpërmjet Bischofshofen, duke shtuar rreth dy orë në kohën e udhëtimit midis Salzburgut dhe Wörgl. Në këtë periudhë, trenat nuk do të ndalen në Kufstein, por do të bëjnë ndalesa në Bischofshofen dhe Schwarzach-St. Veit. Autobusë zëvendësues do të qarkullojnë çdo dy orë midis Kufstein dhe Salzburgut.

Edhe shërbimet e natës preken nga këto mbyllje, me devijime, anulime ndalesash dhe kohë udhëtimi të zgjatura. Gjatë fazës së dytë të punimeve (11-18 gusht), trenat Nightjet 420/421 dhe 40420/40490 që lidhin Innsbruck me Amsterdamin dhe Hamburgun do të fillojnë dhe përfundojnë në Salzburg, në vend të Innsbruckut. Për udhëtarët nga Tirol, do të ofrohet një shërbim zëvendësues hekurudhor për në dhe nga Rosenheim, ku ata mund të bëjnë transferimin për në Nightjets drejt Hamburgut dhe Amsterdamit.

ÖBB kërkon mirëkuptimin e udhëtarëve dhe i fton ata të informohen paraprakisht për çdo ndryshim në lidhjet e tyre. Informacione të detajuara për të gjitha lidhjet e prekura dhe shërbimet me autobusë zëvendësues janë në dispozicion në shërbimin e informacionit të orarit ÖBB SCOTTY dhe përmes shërbimit ndaj klientit në numrin +49 5-1717, transmeton albinfo.ch.