Auns, iniciativë kundër kufijve të hapur

Organizata “Aksioni për një Zvicër të pavarur dhe Neutrale (AUNS) e njohur për orientimin e saj konservativ të djathtë, ka ndërmend të nisë një iniciativë të re. Fjala është për iniciativën e cila kërkon që Zvicra sërish të ketë kontrollin e vet mbi kufijtë gjegjësisht për daljen e Zvicrës nga Marrëveshja e Shengenit. Në rast se qytetarët zviceranë votojnë pro kësaj iniciative atëherë Zvicra duhet të ndërpresë pjesëmarrjen e saj në Schengen, shkruan sonntagsblick.

Kryetari i Auns, njëherësh deputet nacional i SVP-së nga St. Galleni, Lukas Reimann ka konfirmuar se po punohet në drejtim të një iniciative të tillë. “Kufijtë e haur, viteve të fundit na kanë sjellë probleme të mëdha”, thotë ai duke vërtetuar se parapërgatitjet janë para përfundimit.

Kritikave se këtë po e bën për qëllime elektorale pasi qe në tetor të këtij viti do të mbahen zgjedhjet nacionale, Reimann u është përgjigjur me mohim: “Jo, ne kemi menduar fillimisht që ta lëmë këtë iniciativë për kohën as zgjedhjeve, por problemet me kufijtë janë bërë aq emergjente sa që është dashur të shpejtojmë”, ka thënë ai.