Arrihet ujdia për Lirinë e Lëvizjes me Kroacinë

Sipas kësaj ujdie të arritur, marrëveshja në fjalë me Kroacinë mund të hyjë në fuqi vetëm pasi që Zvicra dhe BE-ja të jenë marrë vesh në lidhje me temën e migracionit

Dy dhomat e Parlamentit të Zvicrës, Dhoma Nacionale dhe ajo e Kantoneve (Senati) kanë arritur sot pajtimin për për mënyrën e zbatimit të zgjerimit të Marrëveshjes për Lirinë e Lëvizjes me Kroacinë.

Sipas kësaj ujdie të arritur, marrëveshja në fjalë me Kroacinë mund të hyjë në fuqi vetëm pasi që Zvicra dhe BE-ja të jenë marrë vesh në lidhje me temën e migracionit, njofton srf.ch. Kjo temë, siç dihet, ngarkohet nga votimi, që populli i ka bërë iniciativës «Kundër Migracionit Masiv» në referendumin e shkurtit të vitit 2014, transmeton albinfo.ch

Për të arritur ujdinë, Dhoma Nacionale ia ka përshtatur qëndrimin e saj Dhomës së Kantoneve pasi që Konferenca unifikuese e dy dhomave kishte propozuar këtë version.

Zgjerimi i lirisë së lëvizjes edhe në Kroaci është kusht që BE-ja ia ka vënë Zvicrës në mënyrë që bashkëpunimi në sferën e kërkimeve shkencore me Zvicrën të mund të bëhet në formën e tij të plotë.