Shqipëri: Arrestohet prokurori në sallën e gjyqit

Me urdhër të Prokurorisë së Krimeve të Rënda është arrestuar në sallën e gjyqit prokurori i Gjirokastrës, Spartak Çoçoli. Arrestimi i tij është bërë pasi rezulton i përfshirë në një akt korrupsioni.

Mësohet se ai ka qenë në përgjim prej një kohe të gjatë. Prokurori Çoçoli po mbahet në Policinë e Gjirokastrës. Prokurori akuzohej nga një qytetar se i kishte marrë 1 mijë euro për çështjen e vajzës së mitur, e cila ishte rrëmbyer, por nuk ka bërë asgjë,raporton reporttv, përcjell albionfo.ch.

Në korrik 2018, nëna e vajzës, përveç ryshfetit, e akuzoi prokurorin edhe për dhunë ndaj saj në përfundim të seancës gjyqësore.

Vajza ishte denoncuar se e kishin rrëmbyer, mirëpo sipas pretendimit të prokurorit Çoçoli, vajza nuk ka pranuar vetë të kthehej në shtëpi.

Mësohet se prej atëherë prokurori i Gjirokastrës ka qenë në përgjim, ndërsa nuk përjashtohet mundësia që në ngarkim të tij të ketë edhe çështje të tjera, ku dyshohet si i përfshirë në afera korruptive.