Aktakuzat për krime lufte në fund të vitit

Gjykata Speciale pritet që në fund të këtij viti të ngrejë aktakuzat e para ndaj ish-eprorëve të UÇK-së, nën dyshimet për krime të luftës. Arrestimet mund ta lëkundin skenën politike kosovare

Gjykata Speciale për krime të luftës, pritet që gjatë vjeshtës së këtij viti, t’i ngrit aktakuzat e para kundër eprorëve të ish-Ushtrisë Çlirimtare të Kosovës (UÇK) për krimet e supozuara gjatë luftës së vitit 1999 dhe menjëherë pas përfundimit të luftës në vitin 2000. Ngritja e aktakuzave thuhet se do ta lëkundin skenën politike kosovare, pasi që flitet për njerëz me shumë ndikon në vend.

Siç shkuan gazeta “Zëri”, Gjykata Speciale tashmë është në përfundim të kompletimit me stafin administrativ, gjyqtarët dhe prokurorët dhe shumë shpejt pritet funksionalizimi i saj i plotë. Funksionalizimi do t’i hapë rrugë ngritjes së aktakuzave të para për ish-eprorët e UÇK-së, lidhur me pretendimet për krime lufte gjatë viteve 1999-2000.

Tashmë Këshilli i Bashkimit Evropian ka miratuar buxhetin për mbështetje të dhomave të Gjykatës Speciale prej afro 29 milionë eurosh për një periudhë njëvjeçare, përderisa  është përmbyllur edhe konkursi për rekrutimin e gjyqtarëve dhe prokurorëve. Tanimë pritet vetëm formaliteti i ratifikimit të Gjykatës nha Holanda, pasi një pjesë e kësaj gjykate do të jetë në Hagë.

Ndryshe, siç është raportuar më herët në mediet lokale në Kosovë, shumë dëshmitarë të mbrojtur që pritet të jenë vendimtar në proceset gjyqësore kundër ish eprorëve të ish-Ushtrisë Çlirimtare të Kosovës, tashmë janë vendosur jashtë Kosovës, kryesisht në vendet e BE-së.

Shumica nga ta, janë ish luftëtarë të UÇK-së që do të deklarojnë kundër eprorëve të tyre në proceset e Gjykatës Speciale. Dëshmitarët thuhet se kanë njohuri për krimet e luftës që kanë ndodhur gjatë vitit 1999-2000 në Kosovë. Po ashtu bëhet e ditur se tashmë komandantët janë në dijeni për dëshmitarët të cilët pritet të dëshmojnë me identitet të mbrojtur për krimet e luftës.

Gjykata Speciale, do të trajtojë akuzat për krime lufte të cilat burojnë nga Raporti i senatorit zviceran Dick Marty.