Ardhmëria e pasigurt e Kombëtares kosovare

Në një artikull të botuar në të përditshmen austriake „Der Standard“, autorët e kanë shqyrtuar situatën aktuale të futbollit kosovar, duke potencuar se tollovitë politike në vend, janë duke e penguar njohjen e Federatës kosovare të futbollit nga ana e FIFA dhe UEFA, duke shkaktuar pakënaqësi te futbolldashësit kosovarë.

Duke përmendur ndeshjen miqësore në mes Kombëtares kosovare dhe ekipit zviceran të Xamax-it që ishte zhvilluar më 9 mars të vitit të kaluar, gazeta në fjalë paraqet pakënaqësitë e zyrtarëve futbollistikë kosovarë për mosnjohjen e Federatës nga organizatat futbollistike ndërkombëtare.

Më në fund, duke cekur ardhmërinë e pasigurt të Kombëtares kosovare, e përditshmja austriake përmend edhe emra të renomuar të futbollistëve kosovarë, të cilët daljen e tyre në arenën ndërkombëtare e kanë realizuar duke përqafuar federatat e huaja të futbollit, siç janë Valon Behrami (AC Fiorentina), Granit Xhaka (FC Basel), Xherdan Shaqiri (FC Basel), Albert Bunjaku (FC Nürnberg), Beg Ferati (SC Freiburg) etj.