Apel të huajve me vizën B për të kërkuar pasaportën zvicerane

Për t`i trimëruar ata më shumë që të kërkojnë pasaportën zvicerane,SP/PS ka ofruar edhe këshilltarë të posaçëm për natyralizim

Në ditën e festës nacionale, 1 Gushtit, Partia Socialdemokrate (SP/PS) u ka drejtuar një apel të huajve që jetojnë në Zvicër që të natyralizohen sa më shumë që të jetë e mundur. Madje, për t`i trimëruar ata më shumë që të kërkojnë pasaportën zvicerane, partia në fjalë ka ofruar edhe këshilltarë të posaçëm për natyralizim, shkruajnë mediat zvicerane.

41 anëtarë të SP-së janë vënë në dispozicion për këtë shërbim, në mesin e të cilëve edhe kryetari i saj, Christian Levrat dhe kryetari i Grupit Parlamentar të SP-së në Parlamentin Nacional, Roger Nordmann, transmeton albinfo.ch. Ata, me email por edhe personalisht  do të vihen në shërbim të të huajve që duan të natyralizohen.

Këshillimet që do t`u ofrohen, fillojnë nga mësimi se si plotësohet formulari dhe deri te parapërgatitjet për intervistën me komisionin natyralizues. “Shumë njerëz ndjehen të pasigurte në kryerjen e veprimeve administrative ndërsa për migrantët kjo pengesë është edhe më e madhe”, ka sqaruar Levrat në një prononcim për gazetën “Sonntagsblick”.

Apeli u është drejtuar në radhë të parë 650 mijë të huajve që kanë leje qëndrimi të përkohshëm (vizë B). Është me interes të dihet se për këtë kategori të huajsh do të bëhet shumë shpejt vonë për të marrë pasaportën zvicerane, përcjell albinfo.ch. Kjo për faktin se nga 1 janari 2018, me ligjin e rishikuar, të drejtë kërkimi të pasaportës do të kenë vetëm të huajt me leje qëndrimi të përhershëm (Vizë C).