Anulohen votat në dy vendvotime në Skenderaj

Komisioni Qendror i Zgjedhjeve (KQZ) anuloi dy vendvotime të rivotimit të 9 janarit në Skenderaj, pasi në qendrën e numërimit të votave ishin gjetur parregullsi gjatë procesit të rinumërimit. Ky vendim është marrë me rekomandimin e Qendrës së Numërimit dhe Rezultateve (QNR), ku edhe ka përfunduar në tërësi numërimit dhe rinumërimit i votave i tërë procesit zgjedhor.

Kryetarja e KQZ-së, Valdete Daka të martën ka bërë të ditur se rezultatet nga këto dy vendvotime nuk do të procedohen në rezultatet e përgjithshme.

Në raportin që paraqiti para KQZ-së, shefi i QNR-së, Burim Ahmetaj, bëri të ditur se tashmë ka përfunduar i gjithë procesi i rinumërimit dhe hetimeve nga zgjedhjet e 12 dhjetorit dhe 9 janarit.

Po ashtu KQZ-ja diskutoi edhe për përgatitjet e procesit të rivotimit në Mitrovicë. KQZ-ja nuk miratoi një kërkesë të kryetarit të LDK-së, Isa Mustafa, për ndarjen e punëve brenda këshillave të qendrave të votimit si dhe një kërkesë nga Vetëvendosja për mundësinë që kjo parti të ketë anëtarë në të gjitha këshillat e vendvotimeve.