Ankesë në Gjykatën Federale për “Kopshtin islamik të fëmijëve”

Gjykata Administrative ka thënë se bartësit e projektit nuk e bëjnë dallimin në mes të "mësimit parashkollor profan" dhe përmbajtjeve mësimore religjioze

Në fillim të muajit korrik, Gjykata Administrative e kantonit të Cyrihut pati hedhur poshtë një ankesë të shoqatës islamike “al Huda” lidhur me ndalimin që Zyra për Arsim e Cyrihut dhe Qeveria e Kantonit i kishin bërë hapjes së një kopshti islamik të fëmijëve në Volketswil të Cyrihut.

Arsyetimi që kishte përdorur gjykata në fjalë duke e refuzuar këtë ankesë ka qenë se koncepti i shoqatës në fjalë nuk e bën sa duhet dallimin në mes të “mësimit parashkollor profan” dhe përmbajtjeve mësimore religjioze. Po ashtu gjykata e ka cilësuar si problematike lidhjen e ngushtë të “al Huda”-s me organizatën e kontestuar islamike IZSR.

Por, “al Huda” e ka ndërmend që çështjen ta çojë më lartë, në Gjykatën Federale të Zvicrës. Ajo e kundërshton sidomos në mënyrë energjike lidhjen me IZSR.

Sipas shoqatës në fjalë, gjykata e bën këtë lidhje duke u mbështetur vetëm në faktin se drejtuesja administrative e saj, më parë ka qenë anëtare e IZSR. Por, ajo e kishte braktisur këtë organizatë gjashtë muaj para se të ushtrohej kërkesa për kopshtin islamik të fëmijëve, thuhet në komunikatën e “al-Huda”.