Alarm i rrejshëm për “amok” në Cyrih

Rreth 100 policë dhe personel i ndihmës së parë kanë mbërritur në ndërtesë pak minuta pas alarmit dhe kanë kontrolluar ndërtesën shumëkatëshe gjegjësisht 1400 kthinat e saj

Në mëngjesin e sotëm në një lagje të Cyrihut, në ndërtesën e Shkollës së Lartë të Arteve një alarm ka mobilizuar forca të mëdha policore dhe ka bllokuar jetën në disa ndërtesa ku është dyshuar për sulm. Dikush kishte telefonuar duke alarmuar për një sulm “amok” dhe kjo kishte mjaftuar që policia  së bashku me ndihmën e shpejtë të shkonin në vendin e ngjarjes.

Siç kanë bërë të ditur për mediet, të gjithë njerëzit, disa mijëra sish që kanë qëlluar në ambientet e Shkollës së Lartë janë urdhëruar të qëndronin të bllokuar aty. Veç kësaj nga ta është kërkuar të shtriheshin  në dysheme ndërsa kapakët e dritareve të ndërtesës janë mbyllur automatikisht dhe dritat janë fikur. 

Rreth 100 policë dhe personel i ndihmës së parë kanë mbërritur në ndërtesë pak minuta pas alarmit. Specialistët e policisë së qytetit bashkë me njësitin special “Skorpion” kanë kontrolluar ndërtesën shumëkatëshe gjegjësisht 1400 dhomat dhe kthinat e saj.

Pak para mesditës policia ka hequr masat e rrezikshmërisë që kishin bllokuar vendin për më shumë se tri orë. Studentët kanë mundur të shkojnë në shtëpitë e tyre ndërsa mësimi është vendosur të mos mbahet për sot.