Aktakuzë për tre persona, mashtruan për punësime në Gjermani

Mashtruan mbi 400 qytetarë se do ti punësonin në Gjermani, Prokuroria Speciale ngrit aktakuzë ndaj tre personave.

Prokuroria Speciale ka ngritur aktakuzë në Gjykatën Themelore në Prizren, kundër tre personave me inicialet F.H., B.R dhe V.R. për veprën penale mashtrim dhe shmangie nga tatimi.

Sipas prokurorisë, ata gjatë viteve 2016 -2017, kishin mashtrua 489 persona kinse do t’i punësojnë në Gjermani, duke përfituar nga ta shumë prej 2500- 3000 euro.

Gjithashtu, në aktakuzë thuhet se të pandehurit me dashje kanë lëshuar mbi 400 kontrata të falsifikuara, për punësim në shtetin e Gjermanisë, në emër të shtetasit gjerman M. Sch, pa autorizimin e tij paraprak.