Aksion policor kundër emigrantëve të paligjshëm

Nga data 13 deri më 26 tetor do të zhvillohet një operacion i madh policor ku do të angazhohen mijëra policë në tërë Evropën

Foto Ilustrim

Bëhet fjalë për një nismë të qeverisë italiane dhe do të koordinohet nga drejtoria e Imigracionit dhe e policisë së kufirit e ministrisë së Brendshme. Operacioni është quajtur “Mos Maiorum”, termi që përdornin romakët për “traditat (e mira) të të parëve”.

Në një dokument të rezervuar të dorëzuar në Bruksel më 10 korrik 2014 nga presidenca italiane delegacioneve të shteteve të tjera evropiane janë renditur të gjitha informacionet që agjentët duhet të mblesdhin nga migrantët e ndaluar.

Emigrantët  do të pyeten se si kanë ardhur e si zhvendosen në zonën Schengen, e që më pas të mund të godasin rrjetin e trafikantëve të njerëzve.

Në veçanti, kërkohet të zbulohet si vijnë: “rruga që bëjnë, mjetet e transportit që përdorin deri kur mbërrijnë në një vend të BE-së”, por edhe “udhëtimi i programuar e vendmbërritja finale”, raportojnë mediat italiane.

Migrantët do të pyeten gjithashtu edhe nëse kanë përdorur “dokumente udhëtimi të falsifikuara, kanë paraqitur kërkesa azili, të dhëna mbi trafikantët e njerëzve, kombësia dhe vendi i rezidencës, sa para kanë paguar për udhëtimin”.

Kontrollet do të bëhen në kufij por edhe në të gjithë territorin evropian, sepse kërkohet të mësohet prej tyre edhe rrugëtimi që bëjnë në brendësi të Schengen-it.

Për të gjithë ata që janë pa leje qëndrimi parashikohen dy javë vërtet shumë të rrezikshme. Kush do të ndalohet në kuadër të aksionit „Mos Maiorum,“ nëse nuk është kërkues azili do të dëbohet ose do të futet në një vend të Shengenit..

Për këtë kanë reaguar shoqatat e emigrantëve të cilët thonë se duhet të garantohet  për respektimin e plotë të të drejtave të njeriut dhe të Konventës së Gjenevës për refugjatët.