Aksion kundër drogës në Mitrovicë të Veriut

Albinfo

Policia e Kosovës gjatë së hënës ka kryer një aksion kundër drogës në lagjen “Tre Rrokaqiejt” në Mitrovicë të Veriut.

“Banesa është shfrytëzuar nga S.M. [shtetas i Kosovës i nacionalitetit serb] janë gjetur dhe konfiskuar 60 kartela grafike, makina anti-miner S9, 13 ventilatorë, poça elektrik që shfrytëzohen për rritjen e bimëve të kanabisit, llambë elektrike për laborator, 51 fishekë, tetë shok-bomba të modifikuara”, tha Veton Elshani, zëvendësdrejtor i Policisë në një përgjigje për Kohën.

Në shkurt policia ka zbuluar tre laboratorë droge në Mitrovicë të Veriut. Ndërkaq në maj të vitit të kaluar, policia kishte shkatërruar dy laboratorë droge në Izvor, afër kufirit me Serbinë, ku ishin gjetur edhe sasi të mëdha të bimëve narkotike, të llojit marihuanë. Në prill të atij viti, ishte shkatërruar një laborator droge në Zveçan dhe ishin arrestuar katër serbë, përcjell albinfo.ch.