Aksion i Policisë së Kosovës në veri, konfiskohen armë e paisje për trazira

Foto: Xhelal Sveçla/FB

Policia e Kosovës ka bastisur një lokacion në pjesën veriore të Mitrovicës përkatësisht në fshatin Leshak të komunës së Leposaviqit ku ka sekuestruar 4 granata dore, rreth 12.000 euro, 1 armë automatike të llojit AK47 me 200 fishekë dhe lloje të ndryshme të municionit, radiolidhje e pajisje tjera ndihmëse për trazira.

Lajmin e ka bërë të ditur ministri i Punëve të Brendshme të Kosovës, Xhelal Sveçla përmes një statusi në Facebook, transmeton Albinfo.ch.

”Këto dhe pajisje të tjera dyshohet të jenë pjesë e aktiviteteve të ndryshme ilegale dhe kriminale dhe deri më tash është arrestuar 1 person i nacionalitetit serb në ndërkohë aksioni është duke vazhduar”, ka shkruar Sveçla.

Ai ka thënë se do të mbesin të përkushtuar maksimalisht që në koordinim me të gjitha institucionet e sigurisë të veprojnë në zbatim të ligjit në tërë territorin e Republikës së Kosovës.

“Pa asnjë dallim do të veprojmë mbi çdo individ apo grup të caktuar që synon të cenojë rendin, ligjin dhe sigurinë e qytetarëve dhe vendit tonë”, ka shkruar Sveçla.

Në vijim, përmes fotografive të publikuara ju sjellim krejt çka është konfiskuar në aksionin e Policisë së Kosovës në veri.