Aksident tragjik në autostradë në Kroaci, 2 të vdekur dhe dhjetëra të plagosur

pixabay

Një aksident i rëndë trafiku ka ndodhur në orët e para të mëngjesit të sotëm në autostradën A3 Bregana–Zagreb–Lipovac, ku janë përfshirë një autobus dhe një automjet me targa të Bosnjë dhe Hercegovinës.

Sipas autoriteteve kroate, përplasja fatale ka shkaktuar vdekjen e dy personave dhe ka lënë të plagosur 31 të tjerë. Ministri kroat i Shëndetësisë konfirmoi se rreth një e treta e të lënduarve ndodhen në gjendje të rëndë. Të plagosurit janë dërguar për trajtim mjekësor në spitalet e Zagrebit, Siskut dhe Pakracit.

Ekipet e shpëtimit dhe emergjencës ndërhynë menjëherë në vendin e ngjarjes. Për disa orë, autostrada u bllokua në të dy drejtimet, duke shkaktuar kolona të gjata dhe vonesa të mëdha për qarkullimin.

Të dhënat paraprake, të publikuar anga index.hr tregojnë se aksidenti ka ndodhur pasi një automjet i markës Volkswagen ka goditur një kaproll që kishte dalë në rrugë. Shoferi i mjetit ndaloi për të sinjalizuar automjetet e tjera, por një autobus që po afrohej nuk arriti të frenonte në kohë. Si pasojë, autobusi u përplas me makinën, theu barrierat mbrojtëse dhe kaloi në korsinë e kundërt, transmeton albinfo.ch.

Autoritetet kanë nisur hetimet për të zbardhur plotësisht rrethanat e aksidentit.