Aeroporti i Prishtinës: Nga nesër nuk ka më asnjë fluturim të planifikuar

Aeroporti i Prishtinës ka bërë të ditur se që nga nesër nuk ka më asnjë fluturim komercial të planifikuar.

Përmes një njoftimi, është bërë e ditur se që nga periudha e kufizimit të fluturimeve për shkak të koronavirusit, janë 12 mijë udhëtarë që janë shërbyer në aeroport.

Po ashtu, kanë qenë mbi 10 mijë udhëtarë në nisje nga Prishtina për në destinacionet e tjera.

Njoftimi i plotë nga aeroporti:

Të dashur udhëtarë,

Ju njoftojmë se që nesër, më 22 mars 2020, e ditëve në vijim nuk kemi asnjë fluturim komercial të planifikuar!

Që nga koha e kufizimeve të fluturimeve në aeroport janë rreth 12,000 udhëtarë që ANP ‘Adem Jashari ‘ ka shërbyer, dhe nga kjo shifër janë mbi 10,000 udhëtarë në nisje nga Prishtina për destinacionet e tjera dhe udhëtarët e tjerë në arritje, ku kryesisht janë mërgata jonë.

Më tej, ju njoftojmë se çdo njoftim të ri do ta bëjmë publik këtu!

Në emër të Menaxhmentit dhe gjithë punonjësve të ANP ‘Adem Jashari’ LKIA, iu urojmë shëndet dhe urojmë që ta kalojmë këtë sfidë bashkërisht!