Aeroporti i Prishtinës merr tri çmime të reja

Çmimet e reja vijnë vetëm pak ditë pasi “Communitas Awards” nderoi Aeroportin e Prishtinës me dy çmime prestigjioze

Aeroporti Ndërkombëtar i Prishtinës “Adem Jashari” ka fituar tri çmime të reja nga katër nominimet në “International Business ‘Stevie’ Awards”.

Çmimet e reja vijnë vetëm pak ditë pasi “Communitas Awards” nderoi Aeroportin e Prishtinës me dy çmime prestigjioze.

Hapja e linjave të reja, rritja e numrit të destinacioneve si dhe rritja e numrit të udhëtarëve të shërbyer, sipas komunikatës së Aeroportit, kanë qenë pikat kryesore të vlerësuara nga gjyqtarët e këtyre çmimeve.

Aeroporti Ndërkombëtar “Adem Jashari” mori çmimin Gold në kategorinë Kompania e Vitit – Transport, si dhe Silver për Kampanja – Marrëdhëniet me Media dhe Bronze në kategorinë Shëndeti, Siguria dhe Ambienti.

“Jemi mjaft të kënaqur me performancën tonë gjatë vitit të fundit. Këto çmime dëshmojnë përkushtimin tonë në rritjen e mundësive për udhëtarët tanë duke i kushtuar rëndësi të veçantë kujdesit ndaj ambientit në të njëjtën kohë” , thuhet në komunikatë.