Adoleshentja palestineze arrestohet pasi goditi me shuplakë ushtarin izraelit

Ushtria izraelite ka arrestuar një 17-vjeçare palestineze të martën, pasi një video në të cilën ajo shihej teksa godiste një polic izraelit u bë hit në internet.

E incizuar të premten, video tregon Ahed Tamimin dhe një adoleshente tjetër palestineze teksa u afrohen dy ushtarëve izraelitë dhe më pas i godasin ata. Në një video tjetër shihet se vajzat kërkojnë nga ushtarët të lirojnë shtëpitë e tyre në fshatin Nabi Saleh. Incidenti ndodhi ditën e përplasjeve në Izrael pasi presidenti i SHBA-së, Donald Trump, mori vendim ta njohë Jerusalemin si kryeqytet të Izraelit, transmeton Albinfo.ch.

Policia ka arrestuar edhe nënën e Tamimit, ndërsa ka njoftuar se të dyja do të jenë në mbajtje deri të paktën të enjten.

“Policia nuk dha ndonjë arsye për arrestin e saj”, ka thënë babai i Tamimit, Bassem për “AFP”. Ai po ashtu akuzoi forcat e sigurisë në Izrael për shkatërrim të telefonave, kompjuterëve dhe pajisjeve tjera elektronike në shtëpitë e tyre.

Tamimi është e njohur për përplasjet me Izraelin. Si adoleshente ajo kishte marrë një ftesë për takim me presidentin turk Recep Tayypi Erdogan, pasi një foto e saj përballë ushtarëve izraelitë ishte parë në gjithë botën.