A është vërtet në krizë ekonomia gjermane? Çfarë tregojnë shifrat

Falimentimet dhe shkurtimet e vendeve të punës janë rritur, por ekonomia gjermane vazhdon të mbështetet nga investimet, tregu i qëndrueshëm i punës dhe financat e forta publike.

Lajmet për falimentime kompanish dhe shkurtime të vendeve të punës janë bërë gjithnjë e më të shpeshta në Gjermani, duke ngritur pikëpyetje mbi gjendjen reale të ekonomisë së vendit. Megjithatë, ekspertët theksojnë se tabloja është më komplekse sesa duket në pamje të parë, përcjell albinfo.ch.

Falimentimet e bizneseve kanë arritur nivelin më të lartë në dy dekadat e fundit, ndërsa shumë kompani të mëdha kanë njoftuar reduktime të fuqisë punëtore. Pavarësisht kësaj, tregu i punës ka mbetur relativisht i qëndrueshëm dhe nuk është shfaqur një valë e madhe papunësie.

Sipas analizave ekonomike, Gjermania vazhdon të mbështetet në disa faktorë kyç. Njëri prej tyre është niveli i ulët i borxhit publik, që qëndron rreth 63 për qind të Prodhimit të Brendshëm Bruto, dukshëm më poshtë se mesatarja e eurozonës.

Një tjetër avantazh është fuqia punëtore e kualifikuar dhe lidhja e ngushtë ndërmjet universiteteve dhe industrisë. Produktiviteti për orë pune mbetet ndër më të lartët në Evropë, ndërsa pas katër vitesh rënie investimet po rikuperohen gradualisht.

Ndërkohë, ekonomia gjermane po kalon një transformim të tregut të punës. Gjatë vitit të fundit, industria humbi rreth 185 mijë vende pune, por pothuajse po aq vende të reja u krijuan në sektorët e shëndetësisë, arsimit dhe administratës publike. Ky zhvillim tregon se vendi po zhvendoset gradualisht drejt një ekonomie të bazuar më shumë te shërbimet.

Edhe pse papunësia është rritur lehtë, numri i përgjithshëm i të punësuarve mbetet pothuajse i pandryshuar. Ekspertët theksojnë se kjo lidhet edhe me daljen në pension të një numri të madh punonjësish dhe mungesën e fuqisë punëtore në disa sektorë.

Sipas ekonomistit Bert Rürup, Gjermania po përjeton periudhën më të gjatë të stanjacionit ekonomik që nga viti 1949. Ai vlerëson se vendi po përballet njëkohësisht me disa sfida strukturore, si dobësimi i globalizimit, rritja e konkurrencës nga Kina, ndryshimet në furnizimin me energji dhe plakja e popullsisë.

Eksportet, që për dekada ishin motori kryesor i ekonomisë gjermane, nuk kanë më të njëjtin ndikim. Barrierat tregtare me SHBA-në dhe konkurrenca në rritje nga Kina kanë ndikuar në ngadalësimin e tyre.

Megjithatë, ekspertët nuk e konsiderojnë situatën si një kolaps ekonomik. Ata argumentojnë se Gjermania po kalon një fazë ristrukturimi, ku falimentimet dhe transformimi i disa sektorëve shoqërohen edhe me krijimin e mundësive të reja.

Në këtë drejtim, qeveria gjermane ka nisur një sërë reformash në sistemin e pensioneve, shëndetësisë dhe tatimeve, ndërsa ka planifikuar investime publike prej 500 miliardë eurosh gjatë 12 viteve të ardhshme. Paralelisht, kompani të mëdha si Siemens dhe Deutsche Bank kanë premtuar investime të konsiderueshme në ekonominë gjermane deri në vitin 2028.

Sipas analistëve, sfidat mbeten të mëdha, por ekonomia më e madhe e Evropës vazhdon të ketë baza të forta për t’u përshtatur me ndryshimet globale dhe për të ruajtur konkurrueshmërinë në vitet e ardhshme./Albinfo.ch

---