A duhet të di gjithçka për historinë e Zvicrës për t’u bërë zviceran?

Një provim natyralizimi është një hap i rëndësishëm drejt marrjes së një pasaporte zvicerane. Por, sa duhet të dini për historinë e vendit për të qenë të suksesshëm?

Zvicra ka një listë të gjatë kërkesash për njerëzit që dëshirojnë të natyralizohen – duke përfshirë lejen e duhur (C), kohëzgjatjen e qëndrimit, aftësinë gjuhësore dhe integrimin, ndër të tjera.

Dhe, të gjithë do të duhet të kalojnë një lloj provimi (me shkrim, me gojë, ose të dyja), megjithëse ata që aplikojnë sipas rregullave të shpejta do ta kenë më të lehtë sesa kandidatët për natyralizim të zakonshëm, përcjell albinfo.ch.

Këto teste krijohen dhe administrohen nga kantone individuale dhe zakonisht mbulojnë tema të tilla, si njohja e historisë, zakoneve dhe traditave – kryesisht lokale, por pyetjet mund të kenë të bëjnë edhe me çështje me rëndësi kombëtare.

Pra, sa mirë duhet ta njihni historinë zvicerane dhe/ose të kantonit tuaj?

Në nivel kombëtar, ju duhet të njiheni me faktet themelore. Së paku, duhet të dini jo vetëm që 1 gushti është Dita Kombëtare, por edhe pse.

Ju gjithashtu duhet të jeni në gjendje t’u përgjigjeni pyetjeve në lidhje me sistemin politik të Zvicrës, duke përfshirë sistemin e saj unik të demokracisë së drejtpërdrejtë, neutralitetin dhe mënyrën se si funksionon qeveria e saj, shkruan thelocal.

E gjithë kjo sigurisht që do të jetë e dobishme, por është po aq e rëndësishme që të jeni të përditësuar për historinë (dhe informacione të tjera të përgjithshme) të kantonit dhe komunitetit tuaj.

Njohuri lokale

Meqenëse çdo kanton krijon provimet e veta të natyralizimit, pyetjet do t’i përkasin në mënyrë specifike historisë së tij.

Si shembull, përveç pyetjeve që lidhen me historinë zvicerane, provimi me përgjigje të shumëfishta i Gjenevës përmban pyetje rreth Lëvizjes Reformuese të qytetit; emri i varkës së ndërtuar në vitin 1904 për të transportuar mallra në liqenin e Gjenevës; si dhe rolin e luajtur Henri Dunant në historinë e qytetit.

Provimet e kantoneve të tjera ndjekin të njëjtën mënyrë, përfshirë atë të Cyrihut. Është e panevojshme të thuhet se të gjitha provimet e shtetësisë janë në gjuhën zyrtare të kantonit.

Po në lidhje me njohuritë e komunitetit tuaj lokal?

Po, kjo është shumë, shumë e rëndësishme. Nëse aplikimi juaj plotëson kërkesat kantonale, ai do t’i dërgohet për miratim autoritetit federal kompetent, i cili është Sekretariati Shtetëror për Migracionin (SEM).

Aplikimi juaj më pas do të kthehet në kanton, i cili vendimin përfundimtar nëse mund të bëheni zviceran do t’ia lë autoriteteve të fshatit ose qytetit ku jetoni.

Në varësi të faktit nëse jetoni në një qytet apo një komunitet të vogël, kjo do të thotë se ose një komitet komunal ose një panel i përbërë nga banorë vendas, përfundimisht do të vendosë nëse jeni të denjë të jeni zviceran.

Besohet se banorët vendas janë në një pozicion më të mirë për të ‘gjykuar’ nëse të huajt që jetojnë në mesin e tyre janë të integruar në komunitet aq mirë sa të bëhen zviceranë – diçka që as autoritetet kantonale dhe as ato federale nuk mund ta konstatojnë.

Pra, edhe nëse një person i plotëson të gjitha kërkesat e përcaktuara në nivel kantonal dhe federal, çdo komunë vendos në mënyrë autonome për aplikimet për natyralizim.

Në këtë nivel, komitetet janë më të interesuara se sa mirë jeni integruar në komunitetin tuaj lokal dhe sa mirë e njihni qytetin tuaj dhe rrethinat e tij.

Megjithatë, është e mundur që do të pyeteni edhe për historinë lokale – momentet kryesore në të kaluarën e qytetit ose fshatit tuaj.

Këto pyetje mund të shkojnë përtej pyetjeve të zakonshme për kohën kur u krijua komuniteti dhe cilat ngjarje të rëndësishme ndodhën atje.

Në një rast, për shembull, një kandidat u pyet për një rrëshqitje dheu që ndodhi në rajon në 1806 – dhe iu përgjigj saktë. Kështu që një këshillë e mirë është që të bëni detyrat tuaja jo vetëm për historinë e Zvicrës në përgjithësi, por edhe për kantonin dhe komunitetin tuaj në veçanti.

Dhe duke folur për komitetet lokale të natyralizimit…

Shumë herë, këto panele janë akuzuar për mohimin e natyralizimit të kandidatëve të kualifikuar bazuar në arsye thjesht arbitrare dhe subjektive.

Shembujt përfshijnë (por nuk kufizohen vetëm në) të huajt që shëtisnin nëpër qytet me pantallona sportive dhe një burrë që kositte lëndinë të dielave dhe festave publike.

 

---