A do të takohen nesër Kurti dhe Thaçi

VV-ja konfirmon se nesër takimi i Kurtit me Thaçin do të ndodhë

Është bërë e ditur se të hënën Presidenti Thaçi pritet ta mandatojë Albin Kurtin, ndërsa LDK mbledh Kryesinë dhe Grupin Parlamentar.

Thuhet se disa letra radhazi u shkëmbyen për t’u dakorduar për një takim. Por presidenti i vendit, Hashim Thaçi dhe kreu i Lëvizjes Vetëvendosje, Albin Kurti, pritet që më në fund të hënën të takohen.

Vlen të theksohet se presidenti Thaçi ka deklaruar se do ta presë fituesin e zgjedhjeve më 6 janar në zyrën e tij, duke ia caktuar orën 15:00.

Nga ana tjetër, Lëvizja Vetëvendosje për T7 ka konfirmuar se takimi mes Thaçit e Kurtit do të ndodhë ashtu siç ka theksuar edhe kreu i VV-së, në letrën e dërguar presidentit.

“Në letrën e dërguar Presidentit, Kryetari Kurti ka theksuar se më datën 6 janar, në orën në të cilën mundet presidenti, do të mund të takoheshin. Dhe po, nesër pritet të mbahet takimi”, kanë thënë nga Zyra për Media e VV-së.

Kujtojmë se Kurti pati refuzuar dy ftesa brenda ditës të presidentit Thaçi. Herën e tretë e refuzoi përsëri, po këtë herë dha dhe një propozim, që takimi mes tyre të ndodhë më 6 janar, përcjell albinfo.ch.

---