Votuesit nga diaspora kanë problem me shkarkimin e fletëvotimit

Shumë qytetarë kanë bërë ankesa përmes postimeve në rrjetet sociale se nuk po u mundësohet votimi

Sot ka nisur të rrjedhë afati ligjor për votim me postë (nga diaspora), por Komisioni Qendror i Zgjedhjeve nuk ka publikuar fletëvotimin që duhet shkarkuar ata që do të votojnë me postë.
Për më tepër, në faqen e KQZ-së mungon edhe broshura me emrat e kandidatëve, shkruan KD.

Shumë qytetarë kanë bërë ankesa përmes postimeve në rrjetet sociale se nuk po u mundësohet votimi.
Ndaj vonesave ka shprehur kritika edhe kandidatja për deputete nga radhët e Lëvizjes Vetëvendosje, Donika Gërvalla. Ajo ka thënë se e drejta e votës është e drejtë kushtetuese dhe jo lëmoshë e kryetares së KQZ-së, Valdete Daka.
Përmes një postimi në Facebook ajo ka thënë se edhe pse votimi me postë ka filluar në mesnatë, ende nuk janë publikuar listat e votuesve e as fletëvotimet.
“Sot në mesnatë ka filluar afati për votimin me postë, pra votimin e mërgatës. 10 orë më vonë nuk janë publikuar ende as listat e votuesve dhe as fletëvotimet. Koha është edhe ashtu tepër e shkurtër dhe çdo vonesë e pafalshme”, ka thënë ajo.

Gërvalla ka thënë se KQZ-ja është kthyer në shkelësin më eklatant të kushtetutës duke iu pamundësuar me forma perfide qindra mijëra mërgimtarëve të japin votën dhe kontributin e tyre për ndryshimin.

“Kjo nuk është thjesht një shkelje administrative. Ky është një akt skandaloz i varësisë totale politike nga kapësit e shtetit. Ja pse secili dhe secila duhet të dalë më 14 shkurt dhe të japë votën e tij. Ndryshimi po vjen pashmangshëm dhe po vjen fuqishëm. Nuk ka kush që e ndal, as KQZ-ja.

---