Në Kosovë, me test PCR ose izolim për 7 ditë

Kosova në javët e fundit ka pasur rënie të të infektuarve me COVID-19

Ministri i Shëndetësisë i Kosovës, Armend Zemaj, ka bërë të ditur se kanë vendosur masën për të gjithë shtetasit e atyre vendeve që janë potencial i shpërndarjes së infeksionit se nuk mund të hyjnë në Kosovë pa testin PCR ose edhe nëse hyjnë, do të shkojnë në izolim për 7 deri në 14 ditë.

Ministri Zemaj këtë njoftim e bëri në një konferencë për media, përcjell albinfo.ch.

“Si Qeveri e Republikës së Kosovës dhe si Ministri e Shëndetësisë kemi vendosur masën se të gjitha shtetet të cilat janë potencial i shpërndarjes së infeksionit nuk mund të hyjnë shtetasit e tyre në Kosovë pa qenë të pajisur me testin PCR dhe nëse hyjnë, duhet të shkojnë në vetizolim për 7 deri 14 ditë, sipas nevojë dhe vlerësimit”, tha ai, por, pa e cekur se për cilat shtete bëhet fjalë, shkruajnë mediat vendore.

Kosova në javët e fundit ka pasur rënie të të infektuarve me COVID-19. Aktualisht, numri total i rasteve pozitive është 15.814, nga 70.219 persona të dyshimtë në virusin SARS-CoV-2 dhe 630 raste të vdekjes.

Numri i përgjithshëm i të shëruarve deri më sot është gjithsej 13.856 raste, kurse numri i rasteve aktive është 1.328.

---