Kosova

Osmani, pas takimit me Lajçakun: Nuk negociohet territori i Kosovës

E martë, 16 Qershor 2020 - 19:20 albinfo.ch

KEYSTONE/EPA/GEORGI LICOVSKI

Kryetarja e Kuvendit të Kosovës, Vjosa Osmani, është deklaruar pas takimit që ka pasur me përfaqësuesin special të Bashkimit Evropian për dialogun Kosovë-Serbi, Miroslav Lajçak.

“Patëm një takim shumë produktiv me përfaqësuesin e BE-së, për dialogun Kosovë-Serbi, Miroslav Lajçak. Në emër të Kuvendit të Kosovës shpreha gatishmërinë tonë që si Kuvend të luajmë një rol të rëndësishëm mbikëqyrës mbi Qeverinë, e cila është e vetmja që duhet ta përfaqësojë Kuvendin, Kosovën, në këtë proces në përputhje me Kushtetutën e vendit”, ka thënë ajo.

Osmani ka shtuar më tej se dialogu duhet të jetë i barabartë mes palëve dhe se ka kuptim vetëm nëse përfundon me njohje reciproke.

“Nuk ka negocim për territorin e Kosovës. Nuk ka negocim sovranitetin e Kosovës. Nuk ka negocim të rendit tonë të brendshëm kushtetues. Këto duhet të jenë tri parimet e Qeverisë”, ka thënë ajo tutje.