Pacolli pritet të kthehet në Kosovë, nuk dihet nëse do të karantinohet

Ministria e Infrastrukturës e Kosovës i ka dhënë leje fluturimi Behgjet Pacollit për në Aeroportin e Prishtinës “Adem Jashari”. Ky fluturim pritet të realizohet ditët në vijim

Kjo është konfirmuar për mediat kosovare nga shefi i kabinetit në Ministrinë e Infrastrukturës, Alban Zogaj.

“Po, ka marrë leje. Kjo është bërë në konsultim të plotë me Ministrinë e Punëve të Jashtme dhe Ministrinë e Shëndetësisë. Sot nuk do të realizohet ky fluturim, por një ditë tjetër”, ka thënë për lajmi.net Zogaj.

Lajmi.net ka kontaktuar edhe me ministrin në detyrë të Shëndetësisë, Arben Vitia, i cili ka thënë se aktualisht janë duke u koordinuar me Abdixhikun për këtë çështje.

“Jemi duke u koordinuar me ministrin e Infrastrukturës, Lumir Abdixhiku, jam duke pritur një përgjigje nga ai. Kjo është ajo çka mund t’ju them deri më tani”, ka thënë Vitia.

Ende nuk dihet nëse Pacolli do të karantinohet sikurse në rastet e kaluara.

Kreu i AKR-së do të kthehet në Kosovë në kohën kur po negociohet arritja e marrëveshjes së koalicionit mes LDK-së, AAK-së dhe koalicionit Nisma-AKR, pasi presidenti ia kërkoi mandatarin Isa Mustafës (LDK).

---