Kadri Veseli udhëton drejt Hagës, për t’u intervistuar nga Prokurori Special

Kryetari i Kuvendit të Republikës së Kosovës, njëherësh lider i PDK-së, Kadri Veseli, sot do të udhëtojë drejt Hagës për t’u intervistuar nga Prokurori Special, shkruan albinfo.ch.

Ai në një prononcim për media ka thënë se është i ftuar nga Gjykata e Hagës për një intervistim.

Sipas tij, Gjykata Speciale është sfidë përballë krimeve makabre serbe dhe në të njëjtën kohë është edhe moment ndërkombëtar për të rikonfirmuar pastërtinë e luftës sonë.

Kujtojmë se menjëherë pas ftesës nga Gjykata Speciale e Hagës, lideri i PDK-së, ka deklaruar se do të përgjigjet pozitivisht ftesës së tyre.

“Gjithë jetën kam qenë i angazhuar për të mirën e Kosovës dhe këtë e kam bërë tërësisht në baza vullnetare dhe me përkushtimin më të lartë. E kam nisur si fëmijë, si nxënës i shkollës fillore në Mitrovicë, me demonstratat e prillit të vitit 1981, si pjesëmarrës, e pastaj në shumicën prej tyre edhe si organizator dhe drejtues. Nga mesi i viteve ’80, unë kam hyrë me ideal në organizatat patriotike, anti-jugosllave, për ta kundërshtuar robërinë dhe për të punuar për lirinë. Kam qenë i bekuar që isha një ndër ideatorët dhe themeluesit e saj, luftëtar i lirisë deri në çlirimin e vendit”, tha Veseli në konferencë para gazetarëve.

Më poshtë mund ta gjeni videon e plotë të prononcimit të tij:

https://www.facebook.com/GOInsajderi/videos/2200214103614197/