LVV: Vuçiq nuk ka pse t’i komentojë simbolet tona

Keystone (AP Photo/Visar Kryeziu)

Së fundi Lëvizja Vetëvendosje, përmes një deklarate, e ka porositur presidentin e Serbisë, Aleksandar Vuçiq, që duhet ta dijë se “Kosova është demokraci, në të cilën askush askujt nuk ia imponon identitetin ose simbolet, e aq më pak mund të censurohet vullneti politik i një subjekti”.

Liburn Aliu, anëtar i Kryesisë së Lëvizjes Vetëvendosje, ka thënë se Vuçiqi nuk është as në pozitën morale e as politike të ankohet për simbolet tona kombëtare.

“Aleksandar Vuçiqi, i cili para pak muajve në Mitrovicë mbajti fjalim lavdërues për (Sllobodan) Milosheviqin, nuk është as në pozitën morale e as politike të ankohet për simbolet tona kombëtare, me të cilat kurrë nuk kemi pushtuar e nuk kemi dëmtuar asnjë fqinj”, ka thënë Liburn Aliu.

Subjekti i Vetëvendosjes i është përgjigjur një shkrimi të presidentit të Serbisë, Aleksandar Vuçiq, në rrjetin social Twitter pas një takimi që Kurti kishte zhvilluar në zyrat e Vetëvendosjes në Prishtinë me ambasadorin e Britanisë së Madhe në Kosovë, Nicholas Abbott, në praninë e flamurit kombëtar, ku kishte ngjallur reagime nga ana e Serbisë.

Albin Kurti, si kandidat i Lëvizjes Vetëvendosje për kryeministrin e ardhshëm të Kosovës, pas zgjedhjeve ka thënë në një intervistë që flamuri i Kosovës do të jetë i pranishëm në zyrën e tij.