Shqipëria, vend i mrekullueshëm për t’u vizituar

Një nga portalet informative më të njohura në botë, MSN, që menaxhohet nga gjiganti i informatikës “Microsoft”, i ka kushtuar një shkrim të gjatë Shqipërisë, ku liston vendet më të bukura për t’u vizituar. Në këtë artikull janë ndarë elementet të cilat e bëjnë këtë vend të mrekullueshëm, ku përfshihen qytetet si Berati, Gjirokastra, Shkodra, Saranda, Butrinti, pastaj Dhermiu, si dhe bukurit e Valbonës dhe maja e Thethit. 

“Vendi i Trashëgimisë Botërore të UNESCO-s është një nga fortesat më të vjetra në Evropë të banuara deri në ditët e sotme. Kalaja në vetvete i përket një epoke tjetër me gurin e ngrënë dhe strukturat mesjetare. Por nëse një vizitë nuk është e mjaftueshme për ju, merrni një dhomë në një nga bujtinat e shumta  brenda kështjellës”, thuhet në jëtë shkrim për qytetin e Beratit. Portali MSN përshkruan fshatrat e jugut të Shqipërisë Vunoin, Dhërmiu  dhe Himarën si destinacione që nuk duhet humbur gjatë çdo udhëtimi në pjesën jugore, përcjell albinfo.ch.

“Ndonëse në muajin gusht mund të mbi popullohen paksa, këto fshatra gjallërohen gjatë verës me festivale, aktivitete dhe motin e mrekullueshëm”, theksohet në shkrim. E për Thethin e Valbonën shkruan se ofërojnë një pamje të jashtëzakonshme që duket si një skenar që nuk i përket kësaj bote, por shkruan se udhëtimi me varkë nëpërmjet Liqenit Koman është një mrekulli.