Zvicra i gjen ilaçin Multiplex Sklerozës?

Medikamenti i ri ka reduktuar numrin e qendrave të inflamacionit krahasuar me testimin me placebo për 89 deri 96% më shumë

Një studim i realizuar paralelisht në 20 vende të botës nën drejtimin e hulumtuesit shkencor nga Universiteti i Bazelit dhe nga Spitali universitar i këtij qyteti, Ludwig Kappos tregon se materia e quajtur Ocrelizumab mund të reduktojë në masë të madhe qendrat e Multiplex Sklerozës në trup dhe recidivët.

Ekipi ka testuar medikamentin Ocrelizumab të prodhuar nga gjiganti farmaceutik Roche i Bazelit të Zvicrës në 220 pacientë, ka njoftuar Universiteti i Bazelit të mërkurën. Ocrelizumab prek proteinat nga në sipërfaqe të qelizave mbrojtëse të trupit, që konsiderohet se bën pjesë në mesin e shkaktarëve të MS-së.

Shkencëtarët kanë prezantuar rezultatet e tyre në revistën shkencore “The Lancet”. Medikamenti i ri ka reduktuar numrin e qendrave aktive të inflamacionit krahasuar me testimin me placebo (medikament fals) për 89 deri 96% më shumë. Ndërsa shpeshtësia e paraqitjes është zvogëluar për 72 deri 80 për qind.

Edhe në krahasim me mjetet që ka pasur deri më tash mjekësia në dispozicion, si Interferon Beta, medikamenti i ri tregon rezultate shumë më të mira. Ndërsa efektet anësore të rënda janë më të rralla.

Deri në futjen e medikamentit të ri në qarkullim, mund të shkojë shumë kohë. Duhet të testohet me më shumë pacientë, në fazën e tretë të studimit.