Ekspozitë e autorit Alan Chin me fotografi nga lufta e Kosovës

Ekspozita është përgatitur nga Shoqata e Studentëve Shqiptarë të Cyrihut dhe mbahet në ambientet e Universitetit të Cyrihut

Shoqata e Studentëve Shqiptarë të  Cyrihut ju fton përzemërsisht në ekspozitën fotografike “Realities of War: Kosova’s Quest for Liberation” (Realitetet e luftës: Kërkesa e Kosovës për çlirim), të fotografit të njohur ndërkombëtarisht dhe të nominuar për çmimin Pulitzer, Alan Chin.

Alan Chin, i cili dokumentoi Luftën e Kosovës si fotograf për gazetën “The New York Times” dhe u nominua për çmimin Pulitzer në vitet 1999 dhe 2000, përdor imazhet e tij mbresëlënëse për të treguar përvojat dramatike njerëzore të arratisjes, pikëllimit, rezistencës dhe çlirimit.

Ekspozita, e cila përkujton 25-vjetorin e përfundimit të Luftës së Kosovës, na fton të shqyrtojmë në mënyrë kritike efektet afatgjata të luftës në vetëdijen kolektive dhe individuale.

Të ekspozuara në muzetë si Muzeu i Artit Modern (MoMA) në Nju-Jork dhe Instituti i Arteve në Detroit, veprat e Chin pasqyrojnë marrëdhënien komplekse midis kujtesës, identitetit dhe trashëgimisë së qëndrueshme të luftës.

Ekspozita qëndron e hapur nga 21-26 tetor 2024

Adresa: Universität Zürich, Lichthof Zentrum, Rämistrasse 71

---