700 mijë udhëtarë u prekën nga mbyllja e ANP “Adem Jashari” si pasojë e pandemisë

Facebook/ Aeroporti Ndërkombëtar i Prishtinës

Për tre muaj nga mbyllja e aeroportit ndërkombëtar të Prishtinës “Adem Jashari” janë prekur rreth 700 mijë udhëtarë, të cilët kishin planifikuar të udhëtonin përmes tij.

Kështu ka bërë të ditur sot Valentina Gara, zëdhënëse në ANP “Adem Jashari”, e cila ka thënë se pamundësia e fluturimeve për rreth 700 mijë udhëtarë është bërë për shkak të pandemisë dhe vendimit të Qeverisë për të mbyllur kufijtë ajrorë.

“Në bazë të planifikimeve, nga datat 8 mars deri më 14 qershor ishte planifikuar rreth 700 mijë udhëtarë të kalojnë përmes ANP-së në vajtje-ardhje, mirëpo për shkak të anulimit të shumicës së fluturimeve, ne nuk kemi pasur mundësi të realizojmë këto fluturime. Është mjaft normale që të kemi një numër kaq të madh të udhëtarëve, të cilët janë prekur nga kjo situatë”, ka thënë Gara.

Gara ka bërë të ditur se nga data 15 qershor ka fluturime të konfirmuara nga disa kompani, ndërsa ka thënë se presin vendimin e Qeverisë së Kosovës për hapjen e plotë të aeroportit për t’i kthyer fluturimet e rregullta.