53 për qind për iniciativën “Ecopop”

Ecopop parasheh që ta kufizojë migracionin në 0.2 për qind në vit, që i bie rreth 17 mijë veta (tash është mbi 80 mijë)

As propaganda kundër saj  që vazhdon prej një viti dhe as mobilizimi i të gjitha partive parlamentare (përfshirë edhe SVP-në) nuk kanë arritur të ndryshojnë qëndrimin e popullatës zvicerane e cila me shumicë vazhdon të përkrahë iniciativën “Ecopop”.

Kjo iniciativë që synon kufizim edhe më të madh të të huajve se sa ajo “kundër migracionit masiv” ka shumë gjasa të fitojë me 53 për qind. Këtë rezultat e ka treguar sondazhi i bërë me më shumë se 13 mijë veta, i publikuar sot në 20minuten. Në fakt, 42 për qind kanë thënë se votojnë sigurisht PRO, ndërsa 11 për qind kanë pohuar se janë “Më shumë për po se për jo”.   

Ecopop parasheh që ta kufizojë migracionin në 0.2 për qind në vit, që i bie rreth 17 mijë veta (tash është mbi 80 mijë). Ndërsa 10 për qind e ndihmave që u jep Zvicra vendeve tjera për zhvillim, duhet të orientohen për planifikimin vullnetar të familjes në vendet e përmendura.

Ajo madje nuk ka dimension ekologjik, thonë përfaqësues të partive ekologjike.

Për këtë ka folur edhe dje një komitet prej mbi 100 deputetësh të të gjitha partive duke prezantuar para medieve në Bernë qëndrimin e tij të qartë kundër iniciativës. Partitë në fjalë janë CVP/PDC, FDP/PLR, GLP, SVP/UDC BDP dhe EVP .

“Absurde dhe të dëmshme” e kanë cilësuar ata këtë iniciativë, e cila, sipas tyre është më e dëmshme se ajo kundër migrimit masiv, e SVP/UDC-së. Kjo për faktin se Ecopop ndryshe nga ajo, nuk i lë fare hapësirë  të lirë veprimi qeverisë.