36 të vdekur nga dhuna familjare gjatë vitit 2015

Gjatë vitit të kaluar policia në Zvicër ka ndërhyrë në më shumë se 14 mijë raste të dhunës familjare. Nga kjo shifër rastesh të dhunës janë regjistruar 9195 të akuzuar, 80 për qind prej të cilëve janë meshkuj

Siç bëhet e ditur në një raport të Byrosë Federale për Barazi të gruas me burrin (EBG) të publikuar në një konferencë në Bernë, tri të katërtat e viktimave të dhunës familjare të ndodhura në Zvicër gjatë vitit 2015, kanë qenë femra, shkruan srf.ch.

Gjatë vitit të kaluar policia në Zvicër ka ndërhyrë në më shumë se 14 mijë raste të dhunës familjare, transmeton albinfo.ch. Nga kjo shifër rastesh të dhunës janë regjistruar 9195 të akuzuar, 80 për qind prej të cilëve janë meshkuj.

EB ka tërhequr vërejtjen se shkalla e recidivizmit te dhuna familjare është shumë e lartë. Sipas statistikave përkatëse, secili person që ka ushtruar dhunë brenda familjes dhe është regjistruar, ka ushtruar së paku edhe njëherë më vonë dhunë.

Si pasojë e dhunës familjare gjatë vitit 2015 janë mbytur 36 persona, nga të cilët tetë fëmijë të moshës parashkollore.

Në 25 kantone të Zvicrës ekzistojnë këshillimore  për gra dhe burra lidhur me dhunën familjare. Ndërsa në Lucern dhe Valis funksionon madje edhe këshillimi obligativ për rastet me dhunë familjare. Qendra kompetente për këshillimoret kundër dhunës thotë se gjatë vitit 2015 këshilla në këto qendra kanë marrë 1500 persona që kanë ushtruar dhunë familjare.